மனிதனுக்கு உணவு எவ்வளவு அத்தியவசியமோ அதை முறையாக பயன்படுத்துவது அதைவிட அத்தியவசியமானது. உணவை வீண்விரயம் ஆக்காமல் பயன்படுத்துவது எல்லாவற்றையும் விட முக்கியமானது.
இப்போதெல்லாம் காலநிலை மாறிவருவதை அடிக்கடி பார்க்கிறோம். அதன் காரணமாக உணவு உற்பத்திக்கு பல அச்சுறுத்தல்கள் ஏற்பட ஆரம்பித்துவிட்டன. கடும்வெயில், வரட்சி, கடும் மழை இப்படி பல காலநிலை மாற்றங்களால் உணவு உற்பத்தியில் பாதகமான மாற்றங்கள் நிகழ்ந்த வண்ணம் இருக்கின்றன. இதற்கிடையில் தற்கால சூழ்நிலை பெரும் உணவுத்தட்டுப்பாட்டை ஏற்படுத்திவிடுமோ என்ற அச்சத்தையும் ஏற்படுத்திவருவதை காண்கிறோம்.
உலகில் போதிய உணவு இல்லாமல் அண்ணளவாக 795 மில்லியன் மக்கள் வாழ்வதாக நாம் கேள்விப்படுகிறோம்.
போதிய உணவின்றி வாழும் இவ்வளவு பெரிய மக்கள் தொகையில் நானும் நீங்களும் இல்லாமல் இருப்பது இறைவன் எமக்குத்தந்த பாக்கியமாக நாம் கருதவேண்டும். பட்டினியில் இருக்காமல் நேரத்திற்கு நேரம் அழகான உணவு கிடைப்பது என்பது எவ்வளவு பெரிய அருள் என்பதை ஒவ்வொரு உணவு வேலைகளிலும் நாம் சிந்திக்க மறந்துவிடவே கூடாது.
இன்றைய உலகில் எடை குறைவான பிள்ளைகள் 100 மில்லியன் வரை வாழ்கிறார்கள் என ஆய்வுகள் தெரிவிக்கின்றன. எமது நாடு உட்பட வளர்ந்து வரும் நாடுகளில் ஆறில் ஒரு குழந்தை போசாக்குக் குறைபாட்டால் எடை குறைவுடன் வாழ்கிறது எனவும் ஆய்வுகள் கூறுகின்றன. இதில் எமது குழந்தைகள் ஆகக்கூடாது என்ற எண்ணமே எங்கள் ஒவ்வொருவரின் உள்ளத்தில் உருவாகச்செய்யும்.
நாம் உணவு உட்கொள்ளும் மூன்று வேலைகளில் குறைந்த பட்சம் ஒரு வேலையிலாவது ‘மில்லியன் கணக்கான மக்கள் போதிய உணவின்றி உயிருக்காய் போராடிக் கொண்டிருக்கிறார்களே’ என்ற உணர்வை வரவழைத்துக் கொண்ட மனித நேயமுள்ள நல்ல மனிதராக நாம் மாறினால் அதுவே உணவு வீன்விரயமாக்கப்படுவதை தவிர்ப்பதற்கான உணர்வு பூர்வமான ஒரு முறையாக அமைந்துவிடும்.
உணவு உடலாரோக்கியத்திலும், உள ஆரோக்கியத்திலும், சமூக ஆரோக்கியத்திலும் உறவு பேணுவதிலும் மிகப்பெரும் செல்வாக்குச் செலுத்தும் இறைவனால் அன்பளிக்கப்பட்ட அழகான பரிசாகும். உயிர் வாழ்வதற்கான திறவுகோளாக
இருப்பதும் உணவாகும். நாம் உணவுக்கு மதிப்பளிக்கக் கூடியவர்களாக இருந்தால், உணவை அருற்பரிசாக ஏற்றுக்கொண்டால் அதை ஒரு போதும் வீண்விரயமாக்க இடமளிக்கவே மாட்டோம்.
ஒரு இறைவிசுவாசி அல்லது ஒரு இஸ்லாமியன் வயிறு நிரம்பியதும் அருள் இறைவனைத் துதிப்பதற்கு ஒரு போதும் மறப்பதில்லை. “எனக்கு உண்ண உணவும் குடிக்க பானமும் தந்து என்னை முஸ்லீமாக்கிய இறைவனுக்கே புகழ் அனைத்தும்” என்று இறைவனை புகழ மறக்கவே மாட்டான்.
‘உணவு மனிதனால் உருவாக்கப்பட்டதல்ல. அது அவன் பூமியில் உயிர்வாழ இறைவனால் அருளாக வளங்கப்பட்டது’ என்பதை இந்த பிரார்த்தனை சான்றாக எடுத்துக் கூறுகின்றது.
உணவுக்காக உயிர் என்பதிலிருந்து விலகி உயிருக்காக உணவு என்பதை உணர்ந்து
வீணாக உண்பதையும் வீணாக விரயமாக்குவதையும் இப்பவே தவிர்ப்போம்.
இந்த இருக்கமான நிலைமையில் உணவை வீணாக்காமல் சிக்கனமாக உண்ண நாம் பழகிவருகின்றோம். அதை தொடர்ந்து கடைபிடிப்போம். சிக்கனத்தின் தேவையையும் அதனால் கிடைக்கும் பலனையும் எமது பிள்ளைகளுக்கு எடுத்துக்காட்டுவோம்.
------------------------------------------