உலகலாவிய ரீதியிலுள்ள 170 பாராளுமன்றங்களில் இலங்கைப் பாராளுமன்றம் உயர்ந்த ஸ்தானத்தில் உள்ளது
- சபாநாயகர் கரு ஜயசூரிய
( மினுவாங்கொடை நிருபர் )
உலகம் முழுவதிலுமுள்ள 170 பாராளுமன்றங்களில் இலங்கைப் பாராளுமன்றம் உயர்ந்த இடத்தில் இருப்பதாகவும், இது உலக நாடுகளுக்கு முன்னுதாரணமான பாராளுமன்றமாக மாறியிருப்பதாகவும் சபாநாயகர் கரு ஜயசூரிய தெரிவித்துள்ளார்.
நாட்டில் புதிய ஜனாதிபதி ஒருவர் தேர்ந்தெடுக்கப்பட்டுள்ளார். புதிய அரசாங்கம் செயற்படுகிறது. எதிர்வரும் மாதங்களில் பொதுத் தேர்தல் நடத்தப்படும். அதன் பின்னர், புதிய சபாநாயகரைத் தெரிவு செய்ய முடியும்.
அவ்வாறு தெரிவு செய்யப்படும் புதிய சபாநாயகர் இந்த முன்னேற்றத்தைத் தொடர்ந்தும் முன்கொண்டு செல்வாரென நம்புகின்றேன்.
பாராளுமன்றத்துக்குள் சகோதாரத்துவத்தை ஏற்படுத்தி, அனைவரும் ஒரே குடும்பத்தவர் போன்று செயற்படும் சூழலை ஏற்படுத்த வேண்டும் என்பதே, 2015 ஆம் ஆண்டு செப்டெம்பர் மாதம் சபாநாயகர் பதவிக்கு நான் நியமிக்கப்பட்டபோது இருந்த பிரதான எதிர்பார்ப்பாக இருந்தது.
கடந்த காலங்களைத் திரும்பிப் பார்க்கும்போது, இது குறித்து திருப்தியடைகின்றேன்.
பாராளுமன்றப் பணியாளர்கள், புத்தாண்டில் தமது பணிகளை உத்தியோகபூர்வமாக ஆரம்பிக்கும் நிகழ்வில் கலந்துகொண்டு உரையாற்றும்போதே, சபாநாயகர் இந்த கருத்துக்களை முன்வைத்தார்.
( ஐ. ஏ. காதிர் கான் )