தகுதியற்றவர்களினால் நடத்தப்படும் மேலதிக வகுப்புக்கள் நிறுத்தப்படும் - அமைச்சர் பந்துல குணவர்தன

( மினுவாங்கொடை நிருபர் )

   நாட்டில் அனைத்து மாணவர்களுக்கும் முறையான கல்வி வசதியினை ஏற்படுத்துவதற்காக உயர் கல்வி அமைச்சர் என்ற ரீதியில் நானும் ஜனாதிபதி கோட்டாபய ராஜபக்ஷவும் விசேட கவனம் செலுத்தியிருப்பதாக, அமைச்சரவைப் பேச்சாளரும் அமைச்சருமான பந்துல குணவர்தன தெரிவித்துள்ளார்.

   இதன் மூலம் தகுதி குறைவான சிலரினால் நடத்தப்பட்டு வரும் மேலதிக வகுப்புக்கள் தொடர்பிலான  பிரச்சினைகளுக்குத் தீர்வு கிடைக்கும் என்றும் அமைச்சர் குறிப்பிட்டுள்ளார்.

தகுதியற்றவர்களினால் நடத்தப்பட்டு வரும் மேலதிக வகுப்புக்கள் (Tution class) தொடர்பில் நடைபெற்ற செய்தியாளர்களுடனான சந்திப்பில் ஊடகவியலாளர் ஒருவர் கேட்ட கேள்விக்கு அமைச்சர் இவ்வாறு  பதிலளித்தார்.

   இதேவேளை, நாட்டில் மாணவர்களின் கல்விக்காக நடத்தப்படும் மேலதிக வகுப்புக்கள் மூலம் ஐந்து  பில்லியன் ரூபா பணப் பரிமாற்றம் இடம்பெறுவதாகவும், இது தொடர்பில் அரசாங்கம் மேலதிக வகுப்புக்கள் நடத்தப்படுவதை ஒழுங்குறுத்துவதற்கு நடவடிக்கை மேற்கொண்டுள்ளதா என்றும் இதன்போது ஊடகவியலாளர்  சுட்டிக்காட்டினார்.

   இதற்கு அமைச்சர், சகல மாணவர்களுக்கும் முறையான கல்வியை வழங்குவதற்காக அரசாங்கம் முன்னெடுத்துள்ள நடவடிக்கையின் மூலம் 1000 மும்மொழி தேசியப் பாடசாலைகள் அமைக்கப்படவுள்ளன. 

   பிரதேசங்கள் தோறும் அமைக்கப்படும் இவ்வாறான பாடசாலைகள் மூலம்,  முறையான கல்வி நடவடிக்கைகள் மேற்கொள்ளப்படுவதன் மூலம் இந்தப் பிரச்சினை முடிவுக்குக் கொண்டுவரப்படும் என்று குறிப்பிட்டுள்ளார்.

( ஐ. ஏ. காதிர் கான் )