அல்லாஹு தஆலாவினால் படைக்கப்பட்ட மிகச்சிறந்த படைப்பினங்களில் ஒன்றே காலமாகும். புனித அல்குர்ஆனிலும் கூட சில முக்கியமான விடயங்களை சொல்லுவதற்கு முன்; காலத்தின் மீது சத்தியம் செய்யப்பட்டிருப்பது காலத்தின் பெறுமதியை உணர்த்துவதற்கு போதுமான சான்றாகும். எனவேதான் காலத்தை ஏசுவது, சாடுவது, பழிப்பது, குறைகூறுவது போன்ற விடயங்கள் இஸ்லாத்தில் தவிர்க்கப்பட்டுள்ளன.
அருமை நாயகம் ஸல்லல்லாஹு அலைஹி வஸல்லம் அவர்கள் பின்வருமாறு குறிப்பிடுகின்றார்கள் :
"நீங்கள் காலத்தை ஏச வேண்டாம்! ஏனென்றால் அல்லாஹ்வே அதனை நிர்வகிப்பவனாவான்" (ஸஹீஹ் முஸ்லிம்)
மேற்கூறப்பட்ட ஹதீஸின் விரிவுரையில் இமாம் நவவி ரஹிமஹுல்லாஹ் அவர்கள் கூறுவதாவது :
"அக்கால அரபிகள் தமக்கு மரணம், பொருள் சேதம், நோய் போன்ற ஏதேனும் ஒரு சோதனை, கவலை ஏற்படும் பொழுது காலத்தின் கைசேதமே! போன்ற வாசகங்களை பயன்படுத்தி காலத்தை சாடி வந்தனர். இம்முறையை தடுக்கும் முகமாகவே அருமை நாயகம் ஸல்லல்லாஹு அலைஹி வஸல்லம் அவர்கள் : "நீங்கள் காலத்தை ஏச வேண்டாம்! ஏனென்றால் அல்லாஹ்வே அதனை நிர்வகிப்பவனாவான்" என்று குறிப்பிட்டார்கள்.
(ஷரஹ் முஸ்லிம்)
இதன் மூலம் உணர்த்தப்படுவதானது காலத்திற்கு சுயமாக இவ்வித நிலைமையையும் ஏற்படுத்துவதற்கான ஆற்றல் கிடையாது, ஏற்படும் எல்லா நிலைமைகளையும் அல்லாஹ் ஒருவனே ஏற்படுத்தி நிர்வகிக்கிறான் என்ற நம்பிக்கையின் பக்கம் மக்களை திசை திருப்புவதாகும்.
அன்றைய அரேபியர்களின் இப் பிழையான அணுகுமுறை இன்று எமது சமூகத்திலும் பரவலாக காணப்படுகின்றது. என்ன சோதனை, பிரச்சினை வந்தாலும் கடைசி காலம் , கெட்ட காலம் , எனது கெட்ட நேரம்.... போன்ற காலத்தை ஏசியும் குறைகூறியும் எமது ஆதங்கங்களையும் கவலைகளையும் வெளிக்காட்ட முனைகிறோம். இது அறவே மார்க்கத்தில் அனுமதிக்கப்படாத ஒரு செயலாகும். மாறாக காலமும் அல்லாஹ்வின் ஒரு உன்னதமான படைப்பு எனறு நம்புவதோடு அதில் இடம்பெறுகின்ற ஒவ்வொரு செயலும் ஒவ்வொரு நிகழ்வுகளும் அல்லாஹ்வின் நாட்டத்தின் பெயரில் இடம்பெறுகிறது என்று நம்பிக்கை கொள்வது அவசியமாகும்.
எல்லாம் வல்ல நாயன் எம் அனைவரையும் சோதனைகளிலிருந்து பாதுகாத்து ஈமானின் யதார்த்தத்தை விளங்கிய கூட்டத்தில் சேர்த்து அருள்வானாக!
மௌலவி M.N.M. நஸ்ரின் அல்-பத்தாஹீ,
அக்குறணை,
2020/04/02.