ஊரடங்குச் சட்டத்தை மீறி பேருவளை குட்டிமலை பள்ளிவாசலில் முஸ்லிம்கள் ஒன்றுகூடியதாகவும், அந்த பள்ளிவாசலுக்கு தனிமைப்படுத்தும் நடவடிக்கைகளுக்காகச் சென்ற பொது சுகாதார பரிசோதகர்களின் கடமைகளைச் செய்யவிடாது முஸ்லிம்கள் எதிர்ப்புத் தெரிவித்ததாகவும் சமூக ஊடகங்களில் பரப்பப்படும் செய்தி உண்மைக்குப் புறம்பானதென்று பேருவளை பிரதேச சபை அதிகாரியொருவர் தெரிவித்தார்.
மருத்துவர்களின் பணிப்பின் பேரிலேயே பேருவளை குட்டிமலை பள்ளிவாசலில் முஸ்லிம்கள் ஒன்றுகூடினர். ஊரடங்குச் சட்டத்தை மீறி சட்டவிரோதமாக ஒன்றுகூடியதாகவும் மற்றும் அங்கு தொழுகை நடத்தியதாகவும் கூறப்படும் செய்திகளில் எவ்வித உண்மைத் தன்மையும் இல்லையென்று அவர் மேலும் தெரிவித்தார்.
அவர் இந்த சம்பவம் தொடர்பில் மேலும் தெளிவுபடுத்தியதாவது,
‘சம்பவ தினத்துக்கு முன்னைய நாள் கொரோனா தொடர்பாக மருத்துவ பரிசோதனையில் கலந்துகொள்ளாத, சந்தேகத்துக்குரியவர்கள் இருப்பின் பரிசோதனைக்காக குட்டிமலை பள்ளிவாசலில் ஒன்றுகூடுமாறு பேருவளை பொது சுகாதார பரிசோதகர்கள் மற்றும் நாகொடை மருத்துவமனையின் மருத்துவர்கள் பிரதேச மக்களுக்கு அறிவித்துள்ளனர்.
பரிசோதனைகளுக்காக அம்புலன்ஸ் வண்டியொன்றும் கொண்டுவரப்பட்டுள்ளது. கொரோனா தொற்றுக்குள்ளானவர்களும் அந்த இடத்தில் இருக்கக்கூடும் என்று மக்கள் நினைத்துள்ளனர். அங்கிருந்து கொரோனா பரவக்கூடும் என்று சுற்றியிருந்தவர்கள் அதற்கு எதிர்ப்புத் தெரிவித்துள்ளனர். மைதானமொன்றுக்குச் சென்று பரிசோதனைகளை நடத்துமாறு அவர்கள் கேட்டுக்கொண்டனர்.
பரிசோதனைக்காக வந்தவர்கள் சுற்றுப்புற வீடுகளில் உள்ளவர்கள் அல்ல. அதன் காரணமாகவே சுற்றுப்புறத்தினர் தமக்கு கொரோனா பரவக்கூடும் என்று பதட்டமடைந்துள்ளனர். பொது சுகாதார பரிசோதகர் விடயத்தைத் தெளிவுபடுத்திய பின்னர் பிரதேச மக்கள் அவர்களது வேலைகளுக்கு ஒத்துழைத்துள்ளனர்.’ என்று அவர் குறிப்பிட்டார்.
மஹகொட பொது சுகாதார பரிசோதகர் எம்.டபில்யு. மதுர ஷாலிக தெரண தொலைக்காட்சியில் இதுதொடர்பாக குறிப்பிட்ட கருத்துகள் கீழ்வருமாறு,
‘நேற்று நாகொடை ஆதார மருத்துவமனையில் இருந்து மருத்துவ அதிகாரிகள் குழுவொன்று வருகை தந்தனர். முன்னைய தினம் ஒன்றுதிரட்டப்பட்ட குழுவில் விடுபட்டவர்கள் இந்தக் கிராமத்தில் உள்ளனர். வீட்டில் இருக்கும் குறித்த குழுவினரின் மாதிரிகளைப் பெறத் தேவைப்பட்டது. அவ்வாறு மேற்கொள்ளும் போது பொது மக்கள் பதட்டமடைந்தனர். அப்போது நாம் அவர்களுக்கு விடயத்தைத் தெளிவுபடுத்தி, சமாதானப்படுத்தினோம். அதுதவிர வேறு எந்த அசம்பாவிதமும் நடைபெறவில்லை. கொரோனா விடயத்தைக் கட்டுப்படுத்த முஸ்லிம்கள் எமக்குப் பெரிதும் ஒத்துழைக்கின்றனர்.’