1990 இன் ஏறாவூரின் இரத்த சரித்திரம் மரணம் வரை மங்காது... சுவனவாசிகளான அத்தியாகிகளுக்கு என்றும் சோபனம் உண்டாக பிரார்த்திக்கிறேன் அலி ஸாஹிர் மௌலானா
இற்றைக்கு 3 தசாப்தங்களுக்கு முன்னர் (1990.08.12) இதே போன்ற ஒரு நாளில்தான் ஏறாவூரின் எல்லைப் பிரதேசங்களில் நடுநிசி வேளையிலே உறக்கத்தில் இருந்த 121அப்பாவி பொதுமக்கள் புலிகளால் கோழைத்தனமாக கொல்லப்பட்டதுடன், பலர் உடல் உள ரீதியான காயங்களுக்கு ஆளாக்கப்பட்ட கரிநாளானது.
ஏறாவூர் மக்களதும் முஸ்லிம் சமூகத்தினதும் வரலாற்றிலே இறுதிவரை அழிக்கவும் , மறக்கவும் முடியாத ஒரு துன்பகரமான பொழுதாக அந்நாட்கள் அமைகின்றன, நடுநிசி வேளை தூக்கத்தில் இருக்கும் எம்மை எதற்காக கொல்கிறார்கள் என உணர முடியாமலும் , உயிர் காத்திட தப்பி ஓடும் தன்மை இல்லாத நிலையிலும் பெண்களும் , முதியவர்களும், தாயின் மடியிலே உறங்கிய ஏதுமறியாத பச்சிளம் பாலகர்களும் , ஏன் கர்ப்பிணி தாயின் வயிற்றுக்குள் இருந்த சிசு கூட வயிறு கிழிக்கப்பட்டு அநியாயமாக பலியெடுக்கப்பட்ட இரத்தம் தோய்ந்த துயர வரலாறாக அது மக்கள் மனங்களிலே பதிந்துள்ளது...
எங்களது நெஞ்சை விட்டு எத்தனை ஆண்டுகள்தான் கடந்து போனாலும் இதன் ரணங்களும் ,ஏற்படுத்திய வடுக்களும் மறைந்து போகாது, குறித்த நாளிலே மக்கள் துக்கத்தோடும் அச்சத்தோடும் செய்வதறியாது நின்ற தருணத்திலே இறைவன் உதவியால் என்னால் முடிந்த பணிகளை நான் முன்னெடுத்ததுடன் மக்களை பாதுகாத்து நிம்மதியான சூழலை இப்பிரதேசத்திலே ஏற்படுத்துவதற்கான நடவடிக்கைகளை அப்போதைய பாதுகாப்பு மற்றும் இதர அமைச்சர்கள் , அரசின் உயர் மட்டத்தின் ஊடாக நான் எடுத்த நடவடிக்கைகள் என் நெஞ்சில் நிழலாடுகின்றது, அரசியல் அதிகாரங்களோ , அடையாளங்களோ இன்றி எனக்கான அமானிதத்தை நான் இம்மக்களுக்காக நிறைவேற்றினேன்.
எவ்வித ஈவு இரக்கமும் இன்றி பெண்களும், வயோதிபர்களும் , பச்சிளம் பாலகர்களும் அநியாயமாக துப்பாக்கியால் சுடப்பட்டும், கத்தி கோடரிகளால் வெட்டப்பட்டும் காரணமேயின்றி காவு கொள்ளப்பட்டார்கள், அவர்களது தியாகத்தின் வெளிப்பாடே எமது சமூகத்தினதும் , பிரதேசத்தினதும் வளர்ச்சிக்கும் முன்னேற்றத்திற்கும் அடித்தளமாக அமைந்தது என்றால் மிகையாகாது, அதற்காகவே உலகம் அழியும் வரை நினைவு கூறப்படும் உயர்வான அந்தஸ்த்தினை இறைவன் அந்த ஷூஹதாக்களுக்கு வழங்கி இருக்கிறான்.
பயங்கரவாதத்தின் கோரப்பசிக்கு யார் யாரெல்லாம் எமது பகுதிகளில் இருந்து இரையாக்கப்பட்டு எமது சமூகத்தின் விடிவிற்கு விதையாக்கப்பட்டார்களோ அத்தனை பேருக்காகவும் , அவர்களது இழப்பினால் இன்று வரை கலங்கி நிற்கும் உறவுகளுக்காகவும் உளமார என்றுமே பிரார்த்திப்பதுடன் , மென்மேலும் இறைவன் அவர்களை கண்ணியப்படுத்தி உயர்வான அந்தஸ்த்தினை ஈருலகிலும் வழங்கிட செய்வானாக....
என்றும் உங்களோடு,
செய்யித் அலி ஸாஹிர் மௌலானா...