(01-12-2025)
.jpg)
தற்போதைய பேரிடர் சூழ்நிலையால் பாதிக்கப்பட்ட மக்களுக்கு நிவாரண சேவைகளை மேலும் முறையான, ஒழுங்கமைக்கப்பட்ட மற்றும் திறமையான வகையில் செயல்படுத்துவதற்காக, மத மற்றும் கலாச்சார விவகார பிரதி அமைச்சரின் அலுவலகத்தில் இன்று (01) ஒரு சிறப்புக் கூட்டம் நடைபெற்றது. இந்தக் கூட்டத்தில் அகில இலங்கை ஜமியத்துல் உலமா, இலங்கை வக்பு சபை, முக்கிய தன்னார்வ அமைப்புகள், சிவில் சமூக பிரதிநிதிகள் மற்றும் தொடர்புடைய அரசு அதிகாரிகள் கலந்து கொண்டனர்.
முஸ்லிம் சமய பண்பாட்டு அலுவல்கள் திணைக்களத்தின் பணிப்பாளர் மற்றும் திணைக்களத்தின் அதிகாரிகளும் இந் நிகழ்வில் பங்கேற்றனர்.
கூட்டத்தின் போது, நிவாரணப் பணிகளின் ஒருங்கிணைப்பு குறைவாக இருப்பதால், ஒரே குடும்பங்கள் அல்லது நபர்கள் மீண்டும் மீண்டும் நிவாரணம் பெறுவதும், அதே நேரத்தில் சில பாதிக்கப்பட்டவர்களுக்கு எந்த உதவியும் கிடைக்காமல் இருப்பதும் உள்ளிட்ட பல முக்கிய சிக்கல்கள் உருவாகியுள்ளன என்பதை கவனத்துக்கு கொண்டு வரப்பட்டது. இந்த பிரச்சினைகளை உடனடியாகத் தீர்த்து, நிவாரண சேவைகள் அனைவருக்கும் சமமான, நன்கு நெறிப்படுத்தப்பட்ட மற்றும் நியாயமான முறையில் வழங்கப்பட வேண்டிய அவசியத்தை பங்கேற்பாளர்கள் வலியுறுத்தினர்.
இந்த நோக்கத்திற்காக ஒரு திறமையான ஒருங்கிணைப்பு முறைமை உருவாக்குவது குறித்து விரிவான கலந்துரையாடல்கள் நடத்தப்பட்டன. அதன் பயனாக, முஸ்லிம் சமய பண்பாட்டு அலுவல்கள் திணைக்களத்தின் பணிப்பாளரின் தலைமையில், அனைத்து தொடர்புடைய அமைப்புகளின் கூட்டு ஒத்துழைப்புடன் ஒரு சிறப்புக் குழுவை அமைக்க ஒருமனதாக முடிவு செய்யப்பட்டது. அரசாங்கத்திற்கும் பயனளிக்கும் வகையில், முழு நிவாரண சேவை செயல்முறையை ஒருங்கிணைக்கும் விரிவான அமைப்பை விரைவாக உருவாக்கும் பொறுப்பு இந்தக் குழுவிற்குக் கொடுக்கப்பட்டுள்ளது.
இந்த தீர்மானத்துடன் கூட்டம் நிறைவுற்றது.
ஊடகப் பிரிவு
மத மற்றும் கலாச்சார விவகார பிரதி அமைச்சரின் அலுவலகம்
.jpg)
.jpg)