முஸ்லிம் அரச உத்தியோகத்தர்களுக்கான விசேட நேர ஒழுங்குகள் மற்றும் முற்பணம் – அரசாங்கம் புதிய சுற்றறிக்கை வெளியீடு!
 |
| படம் - AI |
2026 ஆம் ஆண்டிற்கான ரமழான் (நோன்பு) காலத்தில் முஸ்லிம் அரச உத்தியோகத்தர்களுக்கு தொழுகை மற்றும் மத வழிபாடுகளில் ஈடுபடுவதற்கான விசேட நேர ஒழுங்குகளை மேற்கொள்ளுமாறு பொது நிர்வாக, மாகாண சபைகள் மற்றும் உள்ளூராட்சி அமைச்சு அறிவித்துள்ளது.
அமைச்சின் செயலாளர் எஸ். ஆலோகபண்டாரவின் கையொப்பத்துடன் (07.01.2026) திகதியிடப்பட்டு வெளியிடப்பட்டுள்ள 03/2026 இலக்க சுற்றறிக்கையிலேயே இவ்விடயம் குறிப்பிடப்பட்டுள்ளது.
ரமழான் காலப்பகுதி
இம்முறை ரமழான் மாதமானது 2026 ஆம் ஆண்டு பெப்ரவரி மாதம் 19 ஆம் திகதி ஆரம்பமாகி, மார்ச் மாதம் 21 ஆம் திகதி முடிவடையவுள்ளதாக எதிர்பார்க்கப்படுகிறது. இக்காலப்பகுதியில் அரச சேவையில் உள்ள முஸ்லிம் உத்தியோகத்தர்களுக்குப் பின்வரும் நேரங்களில் தொழுகை மற்றும் மதக் கடமைகளை நிறைவேற்றத் தேவையான வசதிகளைச் செய்து கொடுக்குமாறு நிறுவனத் தலைவர்கள் பணிக்கப்பட்டுள்ளனர்.
தொழுகை மற்றும் வழிபாடுகளுக்கான நேரங்கள்:
- மு.ப. 03.30 முதல் மு.ப. 06.00 வரை
- பி.ப. 03.15 முதல் பி.ப. 04.15 வரை
- பி.ப. 06.00 முதல் பி.ப. 07.00 வரை
- பி.ப. 07.30 முதல் பி.ப. 10.30 வரை
இந்த நேரங்களில் உத்தியோகத்தர்கள் வழிபாடுகளில் கலந்துகொள்ளக்கூடிய வகையில் வேலை நேரங்களை ஒழுங்கு செய்து கொடுத்தல் வேண்டும் எனவும், தவிர்க்க முடியாத சந்தர்ப்பங்களில் மட்டும் விசேட லீவு அங்கீகரிக்கப்படலாம் எனவும் சுற்றறிக்கையில் தெரிவிக்கப்பட்டுள்ளது.
பெருநாள் முற்பணம்
மேலும், ரமழான் பெருநாளிற்கு 14 நாட்களுக்கு முன்னதாக, தகுதியுடைய அரச சேவை, கூட்டுத்தாபனங்கள் மற்றும் நியதிச்சட்ட சபைகளில் கடமையாற்றும் முஸ்லிம் உத்தியோகத்தர்களுக்கு 'விழா முற்பணம்' (Festival Advance) வழங்க நடவடிக்கை எடுக்குமாறும் குறித்த சுற்றறிக்கையின் மூலம் அறிவுறுத்தப்பட்டுள்ளது.
அமைச்சுக்களின் செயலாளர்கள், மாகாண பிரதம செயலாளர்கள், திணைக்களத் தலைவர்கள் மற்றும் அரச கூட்டுத்தாபன தலைவர்களுக்கு இந்த அறிவுறுத்தல் வழங்கப்பட்டுள்ளது.
