Makeezah Mahal சமூக சேவை நிறுவனத்தின் ஏற்பாட்டில் ஐந்து எழுத்தாளர்கள் இணைந்து எழுதிய நூல்களின் வெளியீட்டு நிகழ்வு நேற்றைய தினம் (01) பாணந்துறை, தொட்டவத்தையில் உள்ள Makeezah Mahal மண்டபத்தில் அந்த நிறுவனத்தின் முதல்வர் திருமதி ஷமீலா மிஸ்வர் தலைமையில் சிறப்பாக நடைபெற்றது.
பல்வேறு துறை சார்ந்தவர்களின் படைப்புக்கள் மக்கள் பார்வைக்குக் கொண்டு வரப்பட்ட இந்நேர்வில், எழுத்தாளர் நபீல் அபாபீல் எழுதிய அவரது 38-ஆவது நூலான "ஆரோக்கியமான குழந்தை வளர்ப்பு" மற்றும் பல்கலைக்கழகத் தோழிகளின் நினைவுகளையும் லட்சியப் பயணத்தையும் விவரிக்கும் "கனவுகள் வெல்லட்டும்" ஆகிய நூல்கள் வெளியிடப்பட்டன.
அத்துடன் பெண்மையின் சிறப்புகளை மகள், தாய், மனைவி மற்றும் கற்பிப்பவள் எனப் பல்வேறு கோணங்களில் விளக்கும் "பெண் என்பவள்..." எனும் கூட்டுப் படைப்பும், "பெண்மையின் அற்புத உலகு" என்ற நூலும் அறிமுகமானது. இதில் சிபானியா பௌசுல், இன்ஷிராஹ் இப்ஹாம், பயாஸா பாஸில் மற்றும் மெளலவிய்யா றீமா பஹாவுத்தீன் ஆகியோர் பங்களித்துள்ளனர்.
மேலும், மெளலவிய்யா றீமா பஹாவுத்தீன் எழுதிய "சுவனத்தின் சாவி" என்ற நூலும் இவ்விழாவில் சிறப்பிடம் பெற்றது.
கல்வி மற்றும் ஊடகத்துறையைச் சேர்ந்த முக்கியப் பிரமுகர்கள் கலந்துகொண்ட இவ்விழாவில், சம்மாந்துறை வலயக் கல்விப் பணிப்பாளர் திரு. M.T. முஹம்மது ஜனோபர் முதன்மை விருந்தினராகக் கலந்துகொண்டு தலைமை உரை ஆற்றினார்.
இலங்கை முஸ்லிம் மீடியா போரத்தின் உப தலைவர் அஷ்-ஷெய்க் ஜெம்ஸித் அஸீஸ் சிறப்பு விருந்தினராகக் கலந்துகொண்டு சிறப்புரையாற்றியதுடன், மகீஸா மஹால் நிறுவனத்தின் ஆசிரியையும் எழுத்தாளருமான றீமா பஹாவுத்தீன் வரவேற்பு மற்றும் தலைமை உரையினை நிகழ்த்தினார்.
நிகழ்வின் நன்றியுரையினை எழுத்தாளரும் ஆசிரியையுமான சிபானியா பௌசுல் வழங்கினார். நபீல் அபாபீல், இன்ஷிராஹ் இப்ஹாம் மற்றும் பயாஸா பாஸில் ஆகியோரால் நூலாய்வுப் பணிகள் மேற்கொள்ளப்பட்டதோடு, இத்தகைய வெளியீடுகள் ஆரோக்கியமான தலைமுறையை உருவாக்குவதிலும் பெண் கல்வியை ஊக்குவிப்பதிலும் முக்கிய பங்கு வகிக்கும் என விழாவில் சுட்டிக்காட்டப்பட்டது.
இந்நூல்களைப் பெற்றுக்கொள்ள விரும்புவோர் 077 9930356 அல்லது 076 793 2677 ஆகிய எண்களைத் தொடர்பு கொள்ளுமாறு கேட்டுக்கொள்ளப்படுகின்றனர்.
