'அஸ்வெசும' நலன்புரி நன்மைகள் திட்டத்தின் முதலாம் கட்டத் தகவல்களைப் புதுப்பிப்பதற்கான கணக்கெடுப்புப் பணிகள் எதிர்வரும் மே மாதம் 31 ஆம் திகதியுடன் நிறைவடையவுள்ளதாக நலன்புரி நன்மைகள் சபை அறிவித்துள்ளது.
நாட்டின் உண்மையான பொருளாதாரக் கஷ்டங்களினால் பாதிக்கப்பட்டு, அரசாங்கத்தின் நலன்புரி நன்மைகள் மிக அவசரமாகத் தேவைப்படும் மக்களைக் கண்டறிந்து, அவர்களுக்கு விரைவாக நிவாரணம் வழங்குவதே இந்தத் தேசிய திட்டத்தின் முக்கிய நோக்கமாகும் என நிதி, திட்டமிடல் மற்றும் பொருளாதார அபிவிருத்தி அமைச்சின் கீழ் இயங்கும் நலன்புரி நன்மைகள் சபை விடுத்துள்ள ஊடக அறிக்கையில் தெரிவிக்கப்பட்டுள்ளது.
துல்லியமான தகவல்களை வழங்குவது கட்டாயம்
இந்தக் கணக்கெடுப்பு செயல்முறையை வெற்றிகரமாக மேற்கொள்வதற்கு, வீடுகளுக்கு வருகை தரும் கணக்கெடுப்பு அதிகாரிகளுக்கு முழுமையான ஒத்துழைப்பை வழங்குமாறும், உண்மையான மற்றும் துல்லியமான தகவல்களை மாத்திரம் வழங்குமாறும் பொதுமக்கள் கேட்டுக்கொள்ளப்பட்டுள்ளனர். பொதுமக்கள் வழங்கும் துல்லியமான தகவல்களின் அடிப்படையிலேயே, நலன்புரி நன்மைகளைப் பெறுவதற்கு உண்மையிலேயே தகுதியுடைய பயனாளர்களை அடையாளம் காண முடியும் என சபை சுட்டிக்காட்டியுள்ளது.
சட்ட நடவடிக்கை எச்சரிக்கை
நலன்புரி நன்மைகளைப் பெறும் நோக்கில் பொய்யான அல்லது தவறான தகவல்களை வழங்குவது சட்டப்படி குற்றமாகும் என அந்த அறிக்கையில் எச்சரிக்கப்பட்டுள்ளது.
2002 ஆம் ஆண்டின் 24 ஆம் இலக்க நலன்புரி நன்மைகள் சட்டத்தின் 20 ஆம் பிரிவின்படி, தவறான தகவல்களை வழங்கி, நீதவான் நீதிமன்ற விசாரணையில் குற்றவாளியாகக் காணப்படும் பட்சத்தில், ஒரு வருடத்திற்கு மிகாத சிறைத்தண்டனை விதிக்கப்படலாம் என சபை தெரிவித்துள்ளது. மேலும், அவ்வாறு வழங்கப்படும் தவறான தகவல்களை வேறு சில விசேட முறைகள் மூலம் கண்டறிவதற்கான வேலைத்திட்டமொன்றையும் நலன்புரி நன்மைகள் சபை தயாரித்துள்ளது.
பொதுமக்களுக்கு வேண்டுகோள்
எனவே, எதிர்வரும் மே மாதம் 31 ஆம் திகதிக்கு முன்னர் வீடுகளுக்கு வருகை தரும் கணக்கெடுப்பு அதிகாரிகளுக்கு முறையான, உண்மையான தகவல்களை மாத்திரம் வழங்கி, இந்தத் தேசியப் பணியை வெற்றிகரமாக நிறைவேற்ற முழுமையான ஒத்துழைப்பை வழங்குமாறு நலன்புரி நன்மைகள் சபையின் ஆணையாளரும் தலைவருமான நிமல் கொடவெலகெதர பொதுமக்களிடம் தயவான வேண்டுகோள் விடுத்துள்ளார்.
