கடந்த 6 மாத காலமாக நீடித்து வந்த 'ஸ்மார்ட் சிட்டி' பெயர்ப்பலகை தொடர்பான சர்ச்சை, அத்தனகல்ல பிரதேச சபை உப தவிசாளருடனான சந்திப்பைத் தொடர்ந்து சுமுகமான முறையில் முடிவுக்கு கொண்டுவரப்பட்டுள்ளது.
சர்ச்சைக்கான பின்னணி:
குறித்த பாதைக்கு 'யல்கொடதெனிய' என்ற பெயர் ஏற்கனவே இருந்ததாக சில உறுப்பினர்களால் அத்தனகல்ல பிரதேச சபையில் வாதங்கள் முன்வைக்கப்பட்ட நிலையில் மொட்டு கட்சி உறுப்பினர் ஒருவர் 'ஸ்மார்ட் சிட்டி' என்ற பெயர் சூட்டப்படுவதற்கு எதிர்ப்புத் தெரிவித்திருந்தார். இதன் காரணமாக, தேவையான அனைத்து ஆவணங்களும் சமர்ப்பிக்கப்பட்டிருந்த போதிலும், பெயர்ப்பலகைக்கான பிரதேச சபையின் அங்கீகாரத்தைப் பெறுவதில் தொடர் இழுபறி நிலை நீடித்து வந்ததுடன், இதற்காக மேற்கொள்ளப்பட்ட பல முயற்சிகளும் தோல்வியில் முடிந்தன.
சுமுகமான கலந்துரையாடல்:
இந்நிலையில், கடந்த 17 ஆம் திகதி வெள்ளிக்கிழமை அன்று ஸ்மார்ட் சிட்டி அமைப்பின் உப தலைவர் ருஷானின் இல்லத்தில் அவசர சந்திப்பொன்று ஏற்பாடு செய்யப்பட்டிருந்தது. அத்தனகல்ல பிரதேச சபை உப தவிசாளர் சந்திமால் விஜேசிங்க கலந்துகொண்ட இக்கலந்துரையாடலில், நிலவி வரும் சர்ச்சைகளுக்கு தீர்வுகாண்பது குறித்து விரிவாக ஆராயப்பட்டது.
எட்டப்பட்ட தீர்வு:
இதன்போது உப தவிசாளர் சந்திமால் விஜேசிங்கவினால் மாற்று யோசனையொன்று முன்வைக்கப்பட்டது. அதன்படி:
- பெயர்ப்பலகையின் மேல் பகுதியில் 'யல்கொடதெனிய' என்ற பெயரையும்,
- அதற்கு கீழ் பகுதியில் ஓரளவு பெரிய எழுத்துக்களில் 'ஸ்மார்ட் சிட்டி' என்ற பெயரையும் பொறித்து பெயர்ப்பலகையை அமைப்பதற்கு அவர் யோசனை தெரிவித்தார்.
இந்த யோசனைக்கு அமைவாக, கஹட்டோவிட்ட 369 வட்டார சபைத் தலைவர் ஜவாத் இனால் மாதிரி வரைபொன்று (Design) சமர்ப்பிக்கப்பட்டது. அதனை ஏற்றுக்கொண்ட உப தவிசாளர் சந்திமால் விஜேசிங்க, புதிய பெயர்ப்பலகைக்கான தனது உத்தியோகபூர்வ அங்கீகாரத்தை வழங்கினார்.
இத்தீர்மானத்திற்கு அத்தனகல்ல பிரதேச சபை உறுப்பினர் இன்சாப், வட்டார சபைத் தலைவர் முஹம்மத் ஜவாத், ஸ்மார்ட் சிட்டி அமைப்பின் தலைவர் ஷாஜஹான், உப தலைவர் எம்.எஸ்.எம்.ருஷான், பொருளாளர் சட்டத்தரணி எம்.எச்.எம்.அஸ்லம் மற்றும் உப செயலாளர் ஆசிரியர் எம்.டி.எம்.நுஸ்ரத் ஆகியோர் தங்களது பூரண சம்மதத்தைத் தெரிவித்தனர்.
நன்றியுரை:
நீண்டகாலமாக இழுபறியில் இருந்த இந்த சர்ச்சையை முடிவுக்குக் கொண்டு வரவும், இப்பெயர்ப்பலகை விவகாரத்தில் சாதகமான ஒத்துழைப்பை வழங்கவும் முன்வந்த அனைவருக்கும் 'ஸ்மார்ட் சிட்டி' அமைப்பின் சார்பில் மனமார்ந்த நன்றிகள் தெரிவிக்கப்பட்டுள்ளன.
சிராஜ் எம் ஸாஜஹான்