போதைப்பொருள் ஒழிப்புக்கான "நாடே ஒன்றாக தேசிய இயக்கம்" வேலைத்திட்டத்தின் கம்பஹா மாவட்ட செயல்பாட்டு சபை மூன்றாவது முறையாகக் கூடியது
போதைப்பொருட்களை முற்றாக ஒழிப்பதற்காக முன்னெடுக்கப்படும் "நாடே ஒன்றாக தேசிய இயக்கம்" (Ratama Ekata) வேலைத்திட்டத்தின் கம்பஹா மாவட்ட செயல்பாட்டு சபைக் கூட்டம், கம்பஹா மாவட்ட ஒருங்கிணைப்புக் குழுவின் தலைவரும் பிரதி அமைச்சருமான மஹிந்த ஜெயசிங்க தலைமையில் மூன்றாவது முறையாக கடந்த வெள்ளிக்கிழமை (17) பிற்பகல் கம்பஹா மாவட்ட செயலக கேட்போர் கூடத்தில் நடைபெற்றது.
போதைப்பொருள் தடுப்புக்காக ஜனாதிபதியின் தலைமையில் தேசிய சபை உருவாக்கப்பட்டு, முழுச் சமூகத்தையும் உள்ளடக்கிய வேலைத்திட்டம் நடைமுறைப்படுத்தப்பட்டு வருகிறது. அதற்கமைய, நாட்டின் 25 மாவட்டங்களையும் உள்ளடக்கும் வகையில் பிரதேச ரீதியான செயல்பாட்டு சபை முறைமையொன்று செயல்படுத்தப்பட்டு வருகிறது. போதைப்பொருள் தடுப்பு, சிகிச்சை மற்றும் மறுவாழ்வு, போதைப்பொருள் சோதனைகள் மற்றும் கைதுகள் போன்ற நடவடிக்கைகளை மேல் மட்டத்திலிருந்து கீழ் மட்டம் வரை செயல்படுத்துவதற்கான திட்டம் தயாரிக்கப்பட்டு வருகின்றது.
இதற்கமைய, கம்பஹா மாவட்டத்தில் தயாரிக்கப்பட்ட செயல்பாட்டுத் திட்டத்தின் குறைகளை ஆராய்ந்து, புதிய யோசனைகளை உள்ளடக்கி, அதை முறையாக வடிவமைத்து விரைவாகச் செயல்படுத்துவது குறித்து இங்கு கலந்துரையாடப்பட்டது.
குறிப்பிட்ட இலக்குகளைக் கொண்ட திட்டத்தைத் தயாரித்து, அதனூடாக அடையப்பட்ட முன்னேற்றம் மற்றும் வெற்றிகள் குறித்து மதிப்பீடு செய்யப்பட வேண்டும் என கம்பஹா மாவட்டச் செயலாளர் / அரசாங்க அதிபர் லலிந்த கமகே இங்கு சுட்டிக்காட்டினார்.
மேலும், கடந்த சபை அமர்வுகளில் எடுக்கப்பட்ட தீர்மானங்கள், அவற்றின் அமுலாக்கம், எதிர்காலத்தில் எடுக்கப்பட வேண்டிய நடவடிக்கைகள் மற்றும் எதிர்கொள்ளும் பிரச்சினைகள் குறித்தும் விரிவாக ஆராயப்பட்டது.
இந்நிகழ்வில் ரைஃபுல் இஸ்லாம் மௌலவி, விஞ்ஞான மற்றும் தொழில்நுட்ப அமைச்சர் கிரிஷான்த அபேசேன, விளையாட்டுத் துறை பிரதி அமைச்சர் சுகத் திலகரத்ன, பாராளுமன்ற உறுப்பினர்களான சம்பிக ஹெட்டியாரச்சி, ஹேமாலி வீரசேகர, தர்மப்பிரிய விஜேசிங்க, லசித் பாஷண, பிரகீத் மதுரங்க, மேலதிக மாவட்டச் செயலாளர் ஆசிரி வீரசேகர உள்ளிட்ட முக்கியஸ்தர்களும், பாதுகாப்புப் படைத் தளபதிகள், அபாயகர ஔடதங்கள் கட்டுப்பாட்டுச் சபை, சுகாதாரத் துறை, மறுவாழ்வு அதிகாரசபை உள்ளிட்ட பல்வேறு நிறுவனங்களின் பிரதானிகளும் அரச அதிகாரிகளும் கலந்துகொண்டனர்.
சகுந்தலா ஜெயவர்தன - கம்பஹா மாவட்ட ஊடகப் பிரிவு