நாட்டின் 78-வது சுதந்திர தினத்தை முன்னிட்டு, கஹட்டோவிட்ட RC நலன்புரிச் சங்கத்தினால் (RC Welfare Association) ஏற்பாடு செய்யப்பட்ட விசேட சுதந்திர தின நிகழ்வுகள் நேற்று (04) கஹட்டோவிட்ட MMT வீதியில் மிகச்சிறப்பாக நடைபெற்றன.
சுதந்திர தினத்தின் முக்கியத்துவத்தை பறைசாற்றும் வகையில் அமைந்த இந்நிகழ்வில், அத்தனகல்ல பிரதேச செயலாளர் அலுவலகத்தின் சிரேஷ்ட உத்தியோகத்தர்கள், கிராம உத்தியோகத்தர் மற்றும் சுகாதார மருத்துவ அதிகாரி (MOH) அலுவலக உத்தியோகத்தர்கள் என பல அரச அதிகாரிகள் கலந்துகொண்டனர்.
மேலும், கஹட்டோவிட்ட முஹ்யித்தீன் ஜும்ஆ பள்ளிவாசலின் பிரதம கதீப் மௌலவி பர்ஸான் முர்ஸி (பலாஹி), பிரதேசத்தின் முக்கிய பிரமுகர்கள், சமூக ஆர்வலர்கள், சிறுவர்கள் மற்றும் RC நலன்புரிச் சங்கத்தின் உறுப்பினர்கள் என பெருந்திரளானோர் இதில் பங்கேற்று சிறப்பித்தனர்.
மாணவர்களுக்கான கௌரவிப்பு:
இந்நிகழ்வின் ஒரு அங்கமாக, சுதந்திர தினத்தை முன்னிட்டு சிறுவர்களுக்காக நடத்தப்பட்ட சித்திரப் போட்டியில் வெற்றி பெற்ற மற்றும் பங்குபற்றிய மாணவர்களுக்கு சான்றிதழ்கள் வழங்கி வைக்கப்பட்டன. இளைய தலைமுறையினரிடையே தேசப்பற்றையும் கலைத்திறனையும் ஊக்குவிக்கும் நோக்கில் இந்த கௌரவிப்பு அமைந்திருந்தது.
RC நலன்புரிச் சங்கத்தின் இவ்வாறான சமூகப் பணிகள் பிரதேச மக்களிடையே பெரும் வரவேற்பைப் பெற்றுள்ளமை குறிப்பிடத்தக்கது.
