கம்பஹா மாவட்ட போதைப்பொருள் தடுப்பு, சிகிச்சை மற்றும் புனர்வாழ்வு திட்டத்தை தயாரிப்பது தொடர்பான கலந்துரையாடல் ஒன்று, கம்பஹா மேலதிக மாவட்ட செயலாளர் திரு. ஜே.டபிள்யூ.எஸ். கித்சிறி அவர்களின் தலைமையில் அண்மையில் மாவட்ட செயலகத்தில் நடைபெற்றது.
"நாடே ஒன்றாக தேசிய இயக்கம்" (රටම එකට ජාතික මෙහෙයුම) திட்டத்தின் கீழ், அறிவியல் மற்றும் தொழில்நுட்ப அமைச்சர் கிருஷாந்த அபேசேன மற்றும் கம்பஹா மாவட்ட செயலாளர்/அரசாங்க அதிபர் லலிந்த கமகே ஆகியோரின் அறிவுறுத்தலின் பேரில் இந்த கலந்துரையாடல் நடத்தப்பட்டது. இதில் சுகாதாரம், ஸ்ரீலங்கா பொலிஸ், முப்படைகள், புனர்வாழ்வு பணியகம், அபாயகர ஒளடதங்கள் கட்டுப்பாட்டு தேசிய சபை, கடலோர பாதுகாப்பு திணைக்களம் மற்றும் கம்பஹா மாவட்ட செயலகம் ஆகியவற்றின் அதிகாரிகள் கலந்துகொண்டனர்.
இதன்போது போதைப்பொருள் தடுப்பு, சிகிச்சை மற்றும் புனர்வாழ்வு, போதைப்பொருள் தொடர்பான சோதனைகள் மற்றும் கைதுகள் போன்ற துறைகள் குறித்து கலந்துரையாடப்பட்டது. இதற்கமைய, போதைப்பொருள் கடத்தல்காரர்கள் மற்றும் பயன்படுத்துபவர்களைக் கைது செய்வதற்கான சோதனைகள் தொடர்ந்து முன்னெடுக்கப்படும் எனவும், போதைப்பொருள் தடுப்புத் திட்டத்திற்கு சமூகப் பங்களிப்பின் அவசியம் குறித்தும் கருத்துக்கள் பரிமாறப்பட்டன.
இளைய தலைமுறையினரை இந்த போதைப்பொருள் அரக்கனிடமிருந்து மீட்பதற்கு எவ்வாறு செயற்பட வேண்டும் என்பது குறித்து பொது மக்கள் பாதுகாப்பு குழுக்களுடன் கலந்துரையாடப்படும் என இங்கு தெரிவிக்கப்பட்டதுடன், அதற்காக பொலிஸாரின் ஆதரவையும் பொது மக்கள் பாதுகாப்பு குழுக்களுக்கு வழங்குவதற்கு நடவடிக்கை எடுக்கப்படும் என குறிப்பிடப்பட்டது. இலங்கையிலேயே அதிகளவிலான சோதனைகள் கம்பஹா மாவட்டத்திலேயே நடத்தப்படுவதாக இக்கலந்துரையாடலில் தெரியவந்துள்ளதுடன், பாடசாலை மாணவர்களை போதைப்பொருள் பயன்பாட்டிலிருந்து மீட்பதற்கான விழிப்புணர்வு திட்டங்கள் முன்னெடுக்கப்படும் எனவும் சம்பந்தப்பட்ட அதிகாரிகள் தெரிவித்தனர்.
போதைப்பொருள் பயன்பாட்டுடன் அப்பகுதிகளில் இடம்பெறும் குற்றச் செயல்களும் அதிகரிப்பதனால், போதைப்பொருள் பயன்பாட்டை முடிந்தவரை ஒடுக்குவதற்கு நடவடிக்கை எடுக்கப்பட வேண்டும் எனவும், போதைப்பொருள் அற்ற இலங்கையைக் கட்டியெழுப்புவதற்கு பொலிஸார் உள்ளிட்ட அனைத்து பாதுகாப்புப் பிரிவினர், பாடசாலைகள், பெற்றோர்கள், மதத் தலைவர்கள் மற்றும் முழுச் சமூகமும் ஒன்றிணைந்து செயற்பட வேண்டும் எனவும் இங்கு வலியுறுத்தப்பட்டது.
அபாயகர ஒளடதங்கள் கட்டுப்பாட்டு தேசிய சபையின் கம்பஹா மாவட்ட ஒருங்கிணைப்பாளர் திருமதி. ஹர்ஷனி ஆரியரத்ன இந்த நிகழ்வை ஒருங்கிணைப்பு செய்திருந்தார்.
இந்நிகழ்வில் கம்பஹா மேலதிக மாவட்ட செயலாளர் (காணி மற்றும் அபிவிருத்தி) ஆசிரி வீரசேகர, மனநல இயக்குநர் மருத்துவர் எரங்கா ராஜபக்ஷ, முன்னாள் மனநல இயக்குநர் மருத்துவர் எல்.என். மாகொடரத்ன, பிராந்திய சுகாதார மருத்துவ அலுவலகத்தின் மனநல மருத்துவர் தனுஷா மத்துமகே, கம்பஹா மாவட்ட ஒருங்கிணைப்பாளர் ஹர்ஷனி ஆரியரத்ன உள்ளிட்டோர் கலந்துகொண்டனர்.
(மாவட்ட ஊடகப்பிரிவு - கம்பஹா)