இஸ்லாமிய நாட்காட்டியின்படி புதிய ஆண்டின் ஆரம்பத்தைக் குறிக்கும் வகையில் நடாத்தப்படும் "முஹர்ரம் இஸ்லாமிய புத்தாண்டு விழா - 2026 (1448H)", முஸ்லிம் சமய பண்பாட்டலுவல்கள் திணைக்களம் மற்றும் மினுவாங்கொடை ஜும்ஆ மஸ்ஜித் நிர்வாக சபை ஆகியவற்றின் கூட்டு ஏற்பாட்டில் நேற்று (17) மினுவாங்கொடை ஜும்ஆ பள்ளிவாசலில் மிக விமர்சையாக நடைபெற்றது.
இவ்விழாவில் தலைமை உரை நிகழ்த்திய சமய மற்றும் கலாசார அலுவல்கள் பிரதி அமைச்சர் முனீர் முளப்பர், தற்போதைய அரசாங்கத்தின் கீழ் நாட்டில் புதிய மற்றும் நல்லதொரு கலாசாரம் கட்டியெழுப்பப்பட்டுள்ளதாகவும், அதனை மேலும் வலுப்படுத்தி உலக அமைதி குறியீட்டில் (Global Peace Index) இலங்கையை மிக உயர்ந்த இடத்திற்கு கொண்டு செல்வதே அரசாங்கத்தின் எதிர்பார்ப்பு என்றும் தெரிவித்தார்.
அங்கு தொடர்ந்து உரையாற்றிய பிரதி அமைச்சர்:
"மனிதர்களாகிய எமது வாழ்க்கை வருடத்திற்கு வருடம் கடந்து செல்கிறது. அதில் நாம் சமூகத்திற்கும் நாட்டிற்கும் சேர்த்த நல்ல விடயங்கள் எவை என்பதே முக்கியமானது. தீய விடயங்களிலிருந்து விலகி எப்போதும் இதயத்தைத் தூய்மையாக வைத்திருக்க வேண்டும். தூய்மையான இதயம் இருக்கும் இடத்தில் எப்போதும் நன்மை கிட்டும்.
முஹர்ரம் செய்தியும், நபிகளாரின் வரலாற்றுச் சிறப்புமிக்க 'ஹிஜ்ரத்' பயணமும் அமைதியான, நீதியான மற்றும் நியாயமானதொரு நல்ல சமூகத்தை உருவாக்குவதையே நோக்கமாகக் கொண்டுள்ளன.
தற்போதைய நாட்டின் குடிமக்களாக நீங்கள் கொண்டுள்ள பிரார்த்தனைகள் குறித்து திருப்தியடைவீர்கள் என நம்புகிறேன். ஒரு அரசாங்கமாக நாம் கட்டியெழுப்பியுள்ள அந்த நல்ல கலாசாரத்தை மேலும் முன்னோக்கிக் கொண்டு செல்வதற்கு ஒத்துழைப்பு வழங்கும், அன்பான இதயங்களைக் கொண்ட மனிதர்கள் எமது நாட்டில் வாழ்கிறார்கள். நாட்டிலும் உலகிலும் அந்த அமைதி என்றும் நிலைத்திருக்க வேண்டும். அன்போடும் சகோதரத்துவத்தோடும் ஒன்றிணைந்து செயற்படுவதற்கு நம் அனைவருக்கும் ஆசி கிடைக்க வேண்டுமென பிரார்த்திக்கிறேன்."
இந்நிகழ்வில் கலந்து கொண்டு முஹர்ரம் தின வாழ்த்துகளைத் தெரிவித்த கம்பஹா மாவட்ட நாடாளுமன்ற உறுப்பினர் ருவன் திலக ஜயகொடி, கடந்த காலத்தில் அரசியல் ரீதியாக மக்களைப் பிரித்தாள சில அரசியல்வாதிகள் முற்பட்ட போதிலும், தற்போதைய அரசாங்கம் அனைத்து மக்களையும் ஒன்றிணைத்து ஒரே பயணத்தைத் தொடங்கியுள்ளதாகக் குறிப்பிட்டார். இலங்கையர்களாக ஒன்றிணைந்து வாழ்வதற்கு அனைவரும் உறுதியேற்க வேண்டும் என்றும் அவர் வலியுறுத்தினார்.
இந்த தேசிய விழாவின் வரவேற்புரையை முஸ்லிம் சமய பண்பாட்டலுவல்கள் திணைக்களத்தின் பணிப்பாளர் எம்.எஸ்.எம். நவாஸ் நிகழ்த்தியதுடன், பிரதான மதச் சொற்பொழிவை அக்ரம் அபுல்ஹஸன் மதனி மௌலவி நிகழ்த்தினார்.
இந்த விசேட மத வழிபாட்டு நிகழ்வில் மினுவாங்கொடை நகரபிதா ஜனக செனவிரத்ன, மினுவாங்கொடை பிரதேச சபையின் தலைவர் அசங்க சஞ்சீவ, முஸ்லிம் சமய பண்பாட்டலுவல்கள் திணைக்கள அதிகாரிகள், பிரதேச மற்றும் அரச அதிகாரிகள், மினுவாங்கொடை மஸ்ஜித் நிர்வாக சபையின் உறுப்பினர்கள் மற்றும் பெருந்திரளான பிரதேசவாசிகள் கலந்துகொண்டனர்.
Source:
