அத்தனகல்ல பிரதேச சபை: 10 வருட மக்கள் கோரிக்கைக்கு தீர்வு – கஹட்டோவிட்ட ஹிஜ்ரா மாவத்தை புனரமைப்பு!
அத்தனகல்ல பிரதேச சபைக்கு உட்பட்ட கஹட்டோவிட்ட வட்டாரம், குரவலான கிராம உத்தியோகத்தர் பிரிவிலுள்ள ஹிஜ்ரா மாவத்தை வீதி கொங்கிரீட் இட்டு வெற்றிகரமாக புனரமைக்கப்பட்டுள்ளது.
மேற்படி புனரமைப்புப் பணிகள் நேற்றைய தினம் (30) ஆரம்பிக்கப்பட்டிருந்தன.
சுமார் 10 வருடங்களுக்கும் மேலாக பிரதேச மக்களால் தொடர்ச்சியாகக் கோரிக்கை விடுக்கப்பட்டு வந்த போதிலும், எவ்வித கவனமும் செலுத்தப்படாமல் மிக மோசமான நிலையில் காணப்பட்ட 200 மீற்றர் (542 × 11 அடி) நீளமுடைய இப்பகுதியே இவ்வாறு புனரமைக்கப்பட்டுள்ளது.
கூட்டு உழைப்பில் உருவான திட்டம்
மாவட்ட அபிவிருத்தித் திட்டத்தின் கீழ், அத்தனகல்ல பிரதேச சபையின் வேலைப் பிரிவின் (Work Unit) உழைப்புப் பங்களிப்பு மற்றும் சிரமதானக் கூட்டு முயற்சியுடன் முன்னெடுக்கப்பட்ட இரண்டாவது வீதி அபிவிருத்தித் திட்டம் இதுவாகும்.
இப்பணிகள் அனைத்தும் பின்வரும் முக்கிய பிரதிநிதிகளின் தலைமையில் முன்னெடுக்கப்பட்டதாக அத்தனகல்ல பிரதேச சபை தெரிவித்துள்ளது:
- சந்திமால் – உப தவிசாளர், அத்தனகல்ல பிரதேச சபை
- லக்ஷ்மன் – தொழில்நுட்ப குழுத்தலைவர்
- இன்சாப் – கஹட்டோவிட்ட வட்டார பிரதேச சபை உறுப்பினர் மற்றும் வட்டார சபை பிரதிநிதிகள்.
ஒரு தசாப்த காலத்திற்கும் மேலாக இவ்வீதியை புனரமைத்துத் தருமாறு பிரதேச மக்கள் பல்வேறு தரப்பினரிடம் கோரிக்கைகளை விடுத்து வந்த போதிலும் பலன் கிடைக்காத நிலையில், தற்போது இப்பிரச்சினைக்கு முற்றுப்புள்ளி வைக்கப்பட்டுள்ளது.
ஹிஜ்ரா மாவத்தை மக்கள் நீண்டகாலமாக எதிர்நோக்கி வந்த பிரதான போக்குவரத்துப் பிரச்சினைக்குத் தீர்வு கிடைத்துள்ளதால், அத்தனகல்ல பிரதேச சபைக்கும், இதற்கு முழு முயற்சி எடுத்த கஹட்டோவிட்ட வட்டார சபை உறுப்பினர்களுக்கும் பிரதேச மக்கள் உட்பட பலரும் தங்களது மனமார்ந்த நன்றிகளைத் தெரிவித்து வருகின்றனர்.
