அரச சேவைகளை திறம்பட வழங்குவதற்கான டிஜிட்டல் திட்டத்தின் முன்னோடி மாவட்டமொன்றாக கம்பஹா தெரிவு (விபரம்)

 

அரசாங்கத்தின் டிஜிட்டல் மயமாக்கல் கொள்கைக்கு அமைவாக, டிஜிட்டல் சேவைகளை திறம்பட வழங்குவதற்காக முன்மொழியப்பட்டுள்ள திட்டத்தின் முன்னோடித் திட்டத்தை (Pilot Project) அமுல்படுத்தும் மாவட்டங்களில் ஒன்றாக கம்பஹா மாவட்டம் தேர்வு செய்யப்பட்டுள்ளது.

இத்திட்டம் 2027 ஆம் ஆண்டில் முன்னோடித் திட்டமாக தொடங்கப்படவுள்ளது. இதன் கீழ், பிரதேச செயலகங்கள் மற்றும் கிராம உத்தியோகத்தர் பிரிவுகள் மூலம் வழங்கப்படும் சேவைகளை டிஜிட்டல் மயமாக்குவதன் மூலம், அந்த அலுவலகங்களின் அனைத்துப் பணிகளையும் மிகவும் திறமையாகவும் முறைமையாகவும் முன்னெடுப்பதோடு, பொதுமக்களுக்கு வழங்கப்படும் சேவைகளின் வேகத்தையும் திறனையும் அதிகரிப்பது எதிர்பார்க்கப்படுகிறது.

இதற்கமைய, தற்போதுள்ள நடைமுறைகளைக் கண்டறிந்து அவற்றை எளிமையாக்குதல், இதுவரை டிஜிட்டல் மயமாக்கப்பட்ட சேவைகள் மற்றும் அது தொடர்பான பிரச்சினைகளைக் கண்டறிதல், எதிர்காலத்தில் டிஜிட்டல் மயமாக்கக்கூடிய சேவைகளை அடையாளம் காணுதல் ஆகிய பணிகள் மேற்கொள்ளப்படும்.

தற்போது அலுவலகங்களில் உள்ள தொழில்நுட்ப வசதிகள், மனிதவளம் மற்றும் உள்கட்டமைப்பு வசதிகள் குறித்து ஆராய்வதற்காக, பொது நிர்வாக, மாகாண சபைகள் மற்றும் உள்ளூராட்சி அமைச்சின் செயலாளர் எஸ். ஆலோக பண்டார மற்றும் டிஜிட்டல் பொருளாதார அமைச்சின் செயலாளர் வருண ஸ்ரீ தனபால ஆகியோரின் தலைமையில் நேற்றைய தினம் (28) கம்பஹா மாவட்ட செயலகத்தில் விசேட கலந்துரையாடலொன்று நடைபெற்றது.

இக்கூட்டத்தில் கம்பஹா மாவட்ட செயலகம், பிரதேச செயலகங்கள் மற்றும் கிராம உத்தியோகத்தர் அலுவலகங்களில் இதுவரை அடையாளம் காணப்பட்டு அமல்படுத்தப்பட்டுள்ள டிஜிட்டல் திட்டங்களின் முன்னேற்றம் குறித்து விவாதிக்கப்பட்டதுடன், அச்சேவைகளை மேலும் முறைமைப்படுத்துவது மற்றும் புதிய சேவைகளை டிஜிட்டல் மயமாக்குவது தொடர்பான திட்டமிடுதல்கள் குறித்தும் கலந்தாலோசிக்கப்பட்டது.

மேலும், இத்திட்டத்தை அமல்படுத்தும்போது கிராமப்புறங்களில் காணப்படும் தொழில்நுட்பச் சிக்கல்கள், உள்கட்டமைப்பு, மனிதவள மேம்பாடு தொடர்பான விடயங்கள் மற்றும் ஏனைய பிரச்சினைகள் குறித்து விரிவாக ஆராயப்பட்டதுடன், 2027 ஆம் ஆண்டிற்கான திட்டங்களைத் தயாரித்து முன்னோடித் திட்டத்தைத் தொடங்குவதற்குத் தேவையான ஆரம்பக்கட்டப் பணிகள் குறித்தும் விவாதிக்கப்பட்டது.

இக்கலந்துரையாடலில் கம்பஹா மாவட்டச் செயலாளர்/ அரசாங்க அதிபர் லலிந்த கமகே உள்ளிட்ட மாவட்டச் செயலகத்தின் சிரேஷ்ட அதிகாரிகள், பொது நிர்வாக அமைச்சின் மேலதிக செயலாளர்கள், டிஜிட்டல் பொருளாதார அமைச்சின் அதிகாரிகள், பிரதேச செயலாளர்கள், GovPay நிறுவனத்தின் அதிகாரிகள் உள்ளிட்ட அரசு அதிகாரிகள் பலரும் கலந்துகொண்டனர்.

மாவட்ட ஊடகப் பிரிவு - கம்பஹா