2026 புதிய கல்வி ஆண்டு: பாடசாலை நேர அட்டவணையில் மாற்றம், முஸ்லிம் பாடசாலைகளுக்கு வாராந்த அடிப்படையில் நேர மாற்றங்கள்
2026ஆம் ஆண்டுக்கான பாடசாலை நேர அட்டவணை திருத்தங்கள் மற்றும் புதிய கல்வி மறுசீரமைப்புகள் தொடர்பான விரிவான அறிவுறுத்தல்களை கல்வி அமைச்சு வெளியிட்டுள்ளது. இயற்கை அனர்த்தங்கள் மற்றும் போக்குவரத்து சிக்கல்களைக் கருத்திற்கொண்டு, பாடசாலை நேரத்தை நீட்டிக்கும் முந்தைய முடிவுகள் ரத்து செய்யப்பட்டுள்ளன.
1. பாடசாலை நேரங்கள் மற்றும் ஆரம்பத் திகதி
* பாடசாலை நேரம்: அனைத்துப் பாடசாலைகளும் காலை 7.30 மணி முதல் பிற்பகல் 1.30 மணி வரை வழமை போல இயங்கும். (பிற்பகல் 2.00 மணி வரை நீட்டிக்கப்படாது).
* தவணை ஆரம்பம்: தரம் 1 மற்றும் 6 நீங்கலாக, ஏனைய தரங்களுக்கு முதலாம் தவணை 2026 ஜனவரி 05 அன்று ஆரம்பமாகும்.
* தரம் 6: முதலாம் தவணை கல்வி நடவடிக்கைகள் ஜனவரி 21 முதல் ஆரம்பமாகும்.
* தரம் 1: மாணவர்களை இனங்காணும் செயற்பாடு ஜனவரி 05 முதல் ஆரம்பிக்கப்பட்டு, உத்தியோகபூர்வ கல்வி நடவடிக்கைகள் ஜனவரி 29 முதல் தொடங்கும்.
2. தரம் 5 மற்றும் 6-13 வரையான நேர ஒதுக்கீடு
* தரம் 5: வாரத்திற்கு 30 மணித்தியாலங்கள் கற்றல் நடவடிக்கைகளுக்காக ஒதுக்கப்பட்டுள்ளன. இதில் தாய்மொழி மற்றும் கணிதத்திற்கு தலா 5 மணித்தியாலங்கள் வழங்கப்பட்டுள்ளன
* தரம் 6 - 13: ஒரு நாளைக்கு 7 பாடவேளைகள் நடைபெறும். ஒரு பாடவேளைக்கு 45 நிமிடங்கள் ஒதுக்கப்பட்டுள்ளன.
3. முஸ்லிம் பாடசாலைகளுக்கான விசேட கால அட்டவணை
முஸ்லிம் பாடசாலைகளுக்கு வாராந்த அடிப்படையில் நேர மாற்றங்கள் அறிவிக்கப்பட்டுள்ளன:
* திங்கட்கிழமை: காலை 7.30 - பி.ப. 1.30 (7 பாடவேளைகள்)
* செவ்வாய் - வியாழன்: காலை 7.30 - பி.ப. 2.15 (8 பாடவேளைகள்)
* வெள்ளிக்கிழமை: காலை 7.30 - மு.ப. 11.15 (4 பாடவேளைகள் மாத்திரம் - ஜும்மா தொழுகைக்காக).
4. கல்வி மறுசீரமைப்புகள் (Module Based Learning)
தரம் 6 மாணவர்களுக்கு புதிய கல்வி மறுசீரமைப்பின் கீழ் மொழி சார்ந்த மேலதிக கற்றல் தொகுதிகள் (Modules) அறிமுகப்படுத்தப்பட்டுள்ளன:
* தாய்மொழி (சிங்களம்/தமிழ்): 'இலக்கிய நயம்' (Literary Appreciation).
* ஆங்கிலம்: 'Appreciation of Literature - Into the Wild'.
* இந்த புதிய நடைமுறையின் கீழ் தரம் 6 மாணவர்களுக்கு 105 திறமை மட்டங்களை (Credits) பூர்த்தி செய்வது கட்டாயமாகும்.
5. ஆசிரியர்களுக்கான பணி வழிகாட்டல்
* ஒரு பாடசாலை ஆசிரியர் வாரத்திற்கு குறைந்தபட்சம் 28 பாடவேளைகள் கற்பித்தல் நடவடிக்கைகளில் ஈடுபட வேண்டும்.
* உதவி அதிபர்கள் வாரத்திற்கு 10 பாடவேளைகளும், பிரதி அதிபர்கள் 08 பாடவேளைகளும் கற்பித்தலில் ஈடுபடுவது கட்டாயமாக்கப்பட்டுள்ளது.
இந்த அறிவுறுத்தல்கள் அனைத்தும் 2026ஆம் ஆண்டு ஜனவரி மாதம் முதல் அமுலுக்கு வரும் வகையில் அனைத்து மாகாண கல்விச் செயலாளர்கள் மற்றும் அதிபர்களுக்கு அனுப்பி வைக்கப்பட்டுள்ளதாக கல்வி அமைச்சின் செயலாளர் தெரிவித்துள்ளார்.